Rundiangan Mancari Calon Menantu

www.google.comMalin        : Manyo Sutan
Sutan        : lai
Malin        : A-lah parundiangan nan dianta bakeh Sutan ma-agak-i  hari sahari nangko........................................................ tarabik kabanaran diinyiak mamak surang jo baduo, nak kamanangahan siriah sacabiak pinang sagatok, siriah katangah baalamat kato katangah bakarabahan, a-lah alamaik siriah karabahan kato, malantiang manuju tampuak bakato manuju bana, apolah nan kamanjadi tujuan bana mampatamuan niniak mamak nan badunsanak, sarato amai bapak nan badunsanak,, umum biaso mintak tarang  kalam biaso mintak suluah sakian parundiangan dianta bakeh Sutan.
Sutan        :  Alah sampai Malin?
Malin        :  alah
Sutan        :  (ulangi) .............................sabaitu kato?
Malin        :  sabananyo
Sutan        :  Supayo pintak kabuliah kandak balaku mananti Malin sakutiko Malin
Malin        :  mangkonyo rundiang dianta bakeh sutan lamak siriah lega carano lamak kato lega baiyo,kanduang adat kanduang pusako, paiyokan dek Sutan ambo nanti sakutiko.


MANGUMBALIKAN  PARUNDIANGAN


Sutan        :  A-lah kato cako Malin tibo mananti ambo tibo baiyo,bakeh inyiak mamak surang jo baduo, bulek sagelek pipiah salayang alah dapek buah pambarian, alah buah pambariannyo, satantangan malantiang manuju tampuak, bakato manuju bana, alah tujuan bana mampatamuan niniak mamak nan badunsanak sarato amai bapak nan badunsanak,kok singkek nak mintak uleh, kok kurang nak minta tukuak, nak mancari tambahan badan,rumah ketek diampang gadang pintunyo madok ka hilaman, kok nan ketek kini lah gadang, nan gadang nak mancari junjuangan.lah banamo buah pambarian ka  Malin.
Malin        :  (Ulangi).........................sabaitu kato?
Sutan        :  sabananyo
Malin        :  Pambarian diambo, karano Sutan lai batalingo nyariang, bamato nyalang alah ko ado nan tabayang dek Sutan.?